Bertan, errealitate hau gertutik ezagutzen duten hizlarien eskutik, aztergai izango du Glovo, Deliveroo eta Uber Eats bezalako enpresek ekonomia kolaboratzaile gisa mozorrotzen duten lan baldintzen prekarizazioaren urrats berri hau. Izan ere, “Riders” ezizena duten autonomo faltsuen lan baldintzak esklabotzatik hurbil daude.
Ondoren, ahots desberdinek, prekarizazio mota berri honen paradigmari helduko diote, beste lan irtenbiderik ez duten gazteak, eta maiz, lan merkatuan are aukera gutxiago duten etorkinek pairatzen dutena. Horrela, hizlari lanetan izango dira: ‘Glovo’-ko langile Cristina Gonzalez, bere bizipen pertsonala kontatzeko; UPV-EHUko irakasle Andrea de Vicente, kontratazio digital mota honen zirrikitu ilunez arituko dena. Bestetik, Glovon eta Telepizzan infiltratuta egondako Paul Ianok hitz egingo du; Donostiako Babes Sareko kide bat ere izango da bertan gazteek pairatzen duten prekarizazio egoera aztertzeko. Eta azkenik, Alternatibako kide eta EH Bilduko legebiltzarkide Josu Estarrona praktika honen kontra Eusko Legebiltzarrera eramandako ekimenez arituko da.
Ekitaldia datorren asteazkenean, martxoak 11, egingo da 18:30etatik aurrera Alternatibaren egoitzan, Donostiako Autonomia kaleko 15. zenbakian (Amarako topoaren aurrean). Irekia izango da aretoa bete arte.
